Лейлек району, Кара-Суу айылынын тургуну Муктарали Матураимов аттуу жергиликтүү тургун бал аары багууну өз алдынча өнүктүрүп, туруктуу киреше булагына айланта алды. Ал балчылык өнөрүн союз мезгилинде үйрөнүп, учурда заман талабына ылайык жаңылап, ийгиликтүү ишкер катары таанылып келет.

Матураимов 1986–87-жылдары бул тармакта атайын билим алып, ошол эле жылдары бал өндүрүүчү катары иштеп жүргөн. Союз тарагандан кийин бул иш токтоп калган менен, акыркы беш жылдан бери ал кайрадан бул кесипке кайтып, чакан чарбасын түптөп, бал өндүрүшүн жандандырууда.

Бүгүнкү күндө ишкер үч түрдүү породадагы аарыларды багып, жылына 3 тоннага чейин таза, сапаттуу бал өндүрүп келет. Ал өндүргөн продукциясын ички рынокко жеткирип, кардарлар арасында жогорку суроо-талапка ээ болууда. Анын айтымында, бал – табигый дары, ал иммунитетти чыңдап, көптөгөн ооруларга шыпаа берет. Ошондуктан керектөөчүлөрүнүн саны улам арбып жатканын баса белгилейт.

Муктарали Матураимов чарбасын кеңейтүү максатында Кыргызпатенттин стартап программасына катышып, 1 миллион сомдук грантка ээ болгон. Бул каражатка ал аары челектерин жасоочу атайын жабдууларды сатып алып, өндүрүштү модернизациялоого жетишкен. Бул жаңылануу өндүрүмдүүлүктү арттырып, балдын сапатын дагы да жогорулатууга шарт түздү.

Учурда анын өндүргөн балы ички рынокто 700 сомдон сатылып, керектөөчүлөр тарабынан жогору бааланууда. Ишкердин айтымында, балчылык жеңил жумуш эмес — ал чоң мээнетти, кылдаттыкты жана чыдамкайлыкты талап кылат. “Аарынын өзүнүн табиятында эмгекчилдик бар. Аны багып, түшүнүп иштөө да дал ошондой сапаттарды талап кылат,” — дейт ал.

Муктарали мырза таза, табигый азыктар аркылуу коом саламаттыгына салым кошуу менен, келечекте бал аарычылыкты андан ары кеңейтүүнү жана айыл жергесинде жаңы жумуш орундарын түзүүнү көздөөдө.