Бүгүн Министрлер кабинетинин төрагасынын орун басары - суу ресурстары, айыл чарба жана кайра иштетүү өнөр жайы министри Бакыт Төрөбаевдин Нарын облусунда эки күндүк иш сапары башталат. Ал иш сапар алкагында Кочкор, Жумгал, Ат-Башы райондорунда жана Нарын шаарындагы бир катар курулуш объектилери менен таанышат.

Бакыт Төрөбаев алгач Кочкор районундагы Тогуз-Булак участкасында салынып жаткан Соода логистикалык борбордун курулушу менен таанышат. Андан соң Жумгал районундагы Таш-Дөбө айылындагы Түгөл-Сай суу сактагычынын курулушун көрүп, райондук суу чарба башкармалыгынын маалыматын угат.

Андан соң Чаек айылындагы “Байзак” минералдык суусун чыгаруучу “Обосек” өндүрүшүнүн, сүттү кайра иштетүүчү “Көчмөн Азыгы” заводунун, темир-бетон буюмдарын өндүргөн “Жумгалсуукурулуш” коомунун ишин жеринде көрөт.

Ал эми 16-майда Бакыт Төрөбаев Нарын шаарындагы С.Нааматов атындагы Нарын мамалекеттик университетинин Агрардык колледжинин ветеринардык факультетинде болуп, ассимиляторлорду даярдоо борборунун иши менен таанышып, ири мүйүздүү малды жасалма уруктандыруу боюнча иш-чарага катышат.

Андан соң Төрөбаевдин жумуш сапары Ат-Башы районунда уланып, Жапон инвесторлорунун колдоосу менен “Погранич нур” кооперативи тарабынан уюштурулуп жаткан чычырканак, карагат плонтациялары менен таанышат. Кийин Казыбек айыл өкмөтүндөгү “Ат-Башы кенч” кооперативинин жаңы курган тоют базасын, Кашка жол учсатогунда 100 гектар жерге себилген сафлор, 5 гектарга себилген суданка талааларын көрөт.

Иш сапарынын соңунда Төрөбаев Нарын шаарындагы “Азия фут” кайра иштетүү ишканасынын, сафлор жана тоют даярдоо цехинин ишин жеринде көрөт.