Министрлер Кабинетинин Төрагасынын биринчи орун басары Арзыбек Кожошев Евразия экономикалык комиссиясынын Кеңешинин кезексиз жыйынын видеоконференция режиминде өткөрдү. 

ЕЭК Кеңешинин жыйынынын күн тартибинде 7 маселе каралды. Евразиялык экономикалык биримдигине мүчө мамлекеттердин экономикасынын туруктуулугун жогорулатууга багытталган чараларды ишке ашыруу маселеси каралды. Талкуунун жыйынтыгында номенклатурасы бардык тараптар менен макулдашылган товарлардын айрым түрлөрү үчүн ташып келүү бажы алымдарынын ченин убактылуу баштапкы абалга келтирүү, ошондой эле анын кыска мөөнөттөрүн эске алуу менен товарлардын максаттуу киргизилишин тастыктоо зарылдыгынан баш тартуу, чараны практикалык ишке ашыруу процессин жөнөкөйлөтүү чечими кабыл алынды. 

ЕАЭБге мүчө мамлекеттер менен макулдашылган товардык позициялардын тизмесине Кыргызстан тарабынан сунушталган 243 товар киргизилген. Тышкы экономикалык иштин катышуучуларына административдик жүктү азайтуу максатында Бажы биримдигинин комиссиясынын 2011-жылдын 15-июлундагы "Бажы бирлигинин бирдиктүү бажы аймагына айрым категориядагы товарларды киргизүүдө бажы алымдарынан бошотууну колдонуунун тартиби жөнүндө" чечимине өзгөртүүлөрдү киргизүү жөнүндө чечим кабыл алынды. Бул чечимди ишке ашыруу товарлардын ЕАЭБ аймагында чет өлкөлүк товар макамында болуу мөөнөтүн жана бажы алымдарын төлөө боюнча милдеттенмени токтотуу мөөнөтүн кыскартууга багытталган, бул өз кезегинде бажы көзөмөл мөөнөтүн, шарттуу түрдө тышкы экономикалык ишмердиктин катышуучуларына административдик жүктү кыскартууга багытталган.