Кыргызстандын чек арасынан мыйзамсыз өткөн казак жараны кармалды. 

Маалыматка ылайык, ИИМдин Экстремизмге жана мыйзамсыз миграцияга каршы аракеттенүү боюнча кызматынын кызматкерлери мыйзамсыз миграцияга каршы аракеттенүү боюнча жүргүзгөн иш-чара учурунда чет өлкөлүк жаран бир нече жолу мамлекеттик чек арадан мыйзамсыз өткөндүгү жөнүндө маалымат алышкан. 

Жүргүзүлгөн иш-чаралардын натыйжасында Бишкек шаарынын аймагынан Казакстандын жараны кармалган. Айтуусунда, ал Казакстандагы компанияларга ири суммадагы акча каражатын карыз болуп калган жана аны төлөөдөн качуу максатында 2019-жылы Кыргызстандын мамлекеттик чек арасынан мыйзамсыз өткөн. 

Алынган маалымат боюнча, анын Кыргызстанга келгендиги тууралуу маалыматтар жок. 

Бул факт боюнча Кылмыш-жаза кодексинин "Мамлекеттик чек арадан мыйзамсыз өтүү" беренеси боюнча кылмыш иши козголду.

Учурда кошумча ыкчам-тергөө иш-чаралары жүрүп жатат.