Баткен облусуна караштуу Кадамжай районунун Алыш айылында катуу жааган жаандан улам сел жүрдү. ӨКМдин маалымат кызматы билдиргендей, сел 1-август күнү саат 21:30дар чамасында жүргөн. 

Мекеменин Кадамжай райондук бөлүмүнүн алдын ала берген маалыматы боюнча, Алыш айлында 17 турак жайдын короосун, анын ичинен 7 турак үйдүн жер телөөсүнө сел суулары кирген. Сел кетүүчү сай ичиндеги 4 чакырым ички чарбалык жолду бузуп кеткен, учурда каттам кыйынчылык менен өтүүдө. Сай жээгиндеги 13 огороддун жээгин алып, эрозия жараткан. 

Сугат суу берүүчү каналдын 3 жерине кум аралаш шагыл толтурулуп, РЭС ишканасына караштуу 4 мамыны бузуп кеткен. Ошондой эле Үч-Коргон айыл аймагынын Валакыш айылында дагы сел жүрүп, сай ичиндеги 700 метр ички чарбалык жолду бузган. Учурда сел жүргөн аймакта иликтөө, тактоо иштери жүргүзүлүүдө.