Мурда маалымдалгандай, "Кумтөр" алтын кенин иштетүү боюнча долбоорду жүзөгө ашыруунун ар кандай этаптарындагы коррупция боюнча кылмыш ишин тергөө учурунда, экс-премьер-министр Өмүрбек Бабанов кылмышка шектүү экендиги маалымдалып, камакка алынган.  

Бирок, Өмүрбек Бабановго карата камакта кармоо мөөнөтүн узартууну кароодо, Бабановдун ден соолугунун начарлап кеткендигин жана республикадан тышкары жактан медициналык мекемелерде дарылоону талап кылган оорулардын бар экендигин көрсөткөн медициналык документтер алынды.

2021-жылдын 27-июлунда Бишкек шаарынын Биринчи май райондук соту Өмүрбек Бабановдун баш коргоо чарасын өзгөртүп, чет өлкөдө квалификациялуу медициналык жардам алуу мүмкүнчүлүгүн камсыз кылуу максатында ал камактан бошотулду.

Бабанов шектүү деп эсептелген "Кумтөр" долбоорун ишке ашырууда коррупция фактысы боюнча козголгон кылмыш ишин тергөө иштери улантылып, бардык кылмышкерлерди аныктоого жана жоопко тартууга багытталган чаралар көрүлүүдө.

УКМК коомчулукка бул кылмыш иши боюнча тергөөнүн жүрүшү жана натыйжалары жөнүндө, анын ичинде Өмүрбек Бабановго байланыштуу, анын иш-аракеттерине акыркы укуктук баа берүү боюнча тынымсыз маалымат берип турмакчы.