Президент Садыр Жапаровдун сунушунун негизинде электр энергиясынын тарифтерин келерки жылга чейин кымбаттатпоо чечими кабыл алынды. Бул тууралуу Энергетика жана өнөр жай министрлигинен кабарлашты. 

"Эл үчүн электр кубатынын тарифтерин 2022-жылдын апрель айына чейин азыркы баасында кармап туруу чечими кабыл алынды. Тоолуу аймакта жашагандар үчүн 700 киловатт-сааттык лимит алып салынат. Электр кубатын колдонгон башка бардык категориядагылар үчүн тарифтерди карап чыгышат", — деп айтылган маалыматта. 

Эске салсак, апрель айында мамлекет башчы тарифтерди көтөрүү боюнча сунуш киргизген. Бийлик алгач абоненттерди категорияга бөлүүгө ниеттенип, бирок кийинчерээк министрлер кабинети эл үчүн бирдей, киловатт-саатына 1 сом 9 тыйын кылуу боюнча пикирин билдирген. Жаңы бааларды 2021-жылдын сентябрь айында киргизүүнү пландашкан.