Кыргызстанда жыл соңуна чейин 27 жаңы мектеп салынып, пайдаланууга берилет.

Бул тууралуу Архитектура, курулуш жана турак жай, коммуналдык чарба боюнча мамлекеттик агенттигинин маалымат кызматы билдирди. Аталган мектептер 2017-жылы макулдашылган долбоордун алкагында, Сауд өнүктүрүү фонду тарабынан берилген насыяга курулууда. 27 мектептин тендер боюнча жалпы сметалык наркы 25 миллион долларды түзөт. Анын алкагында Бишкек шаарында — 3; Ош шаарында — 1; Ош облусунда — 5;
Чүй облусунда — 4; Ысык-Көл облусунда — 3; Жалал-Абад облусунда — 3; Нарын облусунда — 3; Баткен облусунда — 3; Талас облусунда — 3 билим берүү мекемеси пайда болот. Учурда 150 орундуу төрт мектептин курулушу бүткөрүлгѳн. Алар Нарын облусунун Бугучу айылында, Оштун Маданият жана Чек-Абад, Жалал-Абад дубанынын Кызыл-Ата айылдарында жайгашкан.