Министрлер кабинети Кыргызстанга кумшекер, суу май жана эт импорттогон жарандарды кошумча нарк салыгынан убактылуу бошотууну сунуштап жатат.

Салыктык жеңилдиктерди ушул жылдын 1-июлунан 31-декабрына чейин киргизүү пландалууда. Өкмөт буга чейин мындай жеңилдиктер Мамлекеттик материалдык резервдер фонду үчүн гана каралганын белгиледи. Айыл чарба министрлигинин маалыматы боюнча, мал-жандыктын саны элди эт менен камсыздоого жетишсиз. 2020-жылдын жыйынтыгында өлкөнүн өзүнөн чыккан эт муктаждыктын 59,3 пайызын гана жабары аныкталган. 

Казакстан тирүү малды экспорттоону чектегени жана импорттун азайганы эттин 60-70 пайызга чейин кымбатташына түрткү болду. Министрлер кабинети кумшекер, май жана эт алып келгендерге кошумча нарк салыгынан бошотууну элди азык-түлүк менен жетиштүү деңгээлде камсыздоого жана баасын арзандатууга шарт түзүү үчүн сунуштап жатат.