Кыргызстан Тажикстандын элчисине чек ара маселесине байланыштуу нааразылык нотасын тапшырды. Тышкы иштер министрлиги тажик тараптан Унжу-Булак жергесине орнотулган контейнерди демонтаждоону талап кылды, - деп билдирет ведомствонун маалымат кызматы. 

«Тажикстандын дипломатиялык өкүлчүлүгүнүн жетекчилигине тажик тарап чек араны делимитация жана демаркация кылуу маселеси боюнча өкмөттөр аралык делегацияларынын деңгээлинде жетишилген келишимдерди, андан тышкары Кыргызстан менен Тажикстандын 1-майдагы коргоо министрликтеринин өкүлдөрүнүн жумушчу жолугушуусунда түзүлгөн протоколду бузуу менен эки өлкөнүн чек араларындагы абалды курчутууга алып келүүчү кезектеги чагымчыл аракеттерди көрүп жатканы көрсөтүлдү», - деп айтылат маалыматта. 

Кыргыз тарап эки өлкөнүн чек арасындагы кырдаалдын мындан ары курчушун алдын алуу максатында тажик тараптан Унжу-Булакка орнотулган контейнерди кайра артка чогултуп, аскерлерин жана аскердик техникасын алып кетүүсүн талап кылды.