Үгүт кампаниясын жүргүзүүдө президенттикке ат салышкан бардык талапкерлер үчүн бирдей шарттар түзүлдү, ал эми жарандардын саясий позициялары менен көз караштарын билдирүүсүнө эч кандай тоскоолдуктар болгон жок. Бул тууралуу Президентинин милдетин аткаруучу, Жогорку Кеңештин Төрагасы Талант Мамытов саясий өнөктүккө байкоо жүргүзгөн эл аралык байкоочу миссияларынын башчылары менен жолугушуу маалында билдирди.
Эл аралык байкоочу миссияларынын өкүлдөрү Талант Мамытовду шайлоонун ийгиликтүү өтүшү менен куттуктап, шайлоо процесси жогорку деңгээлде уюштурулгандыгын баса белгилешти. Шайлоочулардын эркин билдирүүсүнө таасир эткендей одоно мыйзам бузуулар катталбагандыгы, президенттик шайлоо менен референдум ачык-айкын өткөндүгү, ал эми добуш берүүнүн жүрүшүндө мыйзам бузуулар аныкталган учурларда жооптуу адамдар тарабынан ыкчам чаралар көрүлгөндүгү айтылды.
Эл аралык байкоочулар өлкөнүн мамлекеттик органдары экономикалык жана эпидемиологиялык оор кырдаалга карабастан, кыска убакыттын ичинде шайлоону жогорку деңгээлде уюштуруу үчүн бир топ иштерди жасап жетишкендигин кошумчалашты. Алар болуп өткөн шайлоо коомчулуктагы тынчтыктын бекемделишине өбөлгө болот деген ишенимин билдиришти.
Мамлекет башчысынын милдетин аткаруучу кезексиз президенттик шайлоо менен референдум Кыргызстан эли үчүн, айрыкча, парламенттик шайлоонун жүрүшүндө орун алган мыйзам бузуулар аныкталган Октябрь окуясынын өңүтүндө өтө чоң мааниге ээ болгонун белгиледи. Ал шайлоо менен референдумду тынч, ачык-айкын жана акыйкат өткөрүү үчүн бардык чаралар көрүлгөнүн айтты.
Талант Мамытов шайлоо процессине эл аралык байкоочуларга ыраазычылык айтып, бул өлкөнүн укуктук талаага кайтып келүүсүндө, коомдук-саясий жана социалдык-экономикалык турмушту жандандырууда Кыргызстан элинин күч-аракетине өзүнчө бир колдоо болуп саналарын билдирди. Ошондой эле алардын берген баасы маанилүү экенин баса белгилеп, айтылган бардык каалоо-тилектер менен сунуштамалар дыкат иликтенип, тиешелүү чаралар көрүлөрүн кошумчалады.