20-октябрдан тарта Кыргызстан мусулмандарынын дин башкармалыгы айымдар үчүн атайын онлайн сабак уюштура баштайт. 

Муфтияттан кабарлашкандай, сабак аптасына 2 жолу уюштурулуп, суроо-жооп иретинде өтөт. Онлайн сабак алкагында «Аялзатынын Ислам дининдеги орду», «Аялзатынын илим алуусу», «Кыздын кырк чачы улуу», «Турмуш куруунун адептери», «Кызды тарбиялоо», «Бактылуу аял» темаларында баяндамалар жасалат. «Учурдагы кырдаалга байланыштуу бардык окуу тармагы онлайн өтүп жатат. Андыктан муфтият айымдар үчүн дагы окууну онлайн баштап, коомчулуктагы аялзатына болгон зордук-зомбулукту азайтууга басым жасайт. 

Балдарды тарбиялоодогу энелердин ролун түшүндүрүп, Ислам дининде аялзаты үчүн эмнелер каралган болсо толугу менен дин аалымдары айтып беришет. Ошондой эле суроо-жооп кылып, аптасына 2 жолу өткөрүүнү чечтик», - деп айтылат маалыматта. Айымдар үчүн уюштурулуп жаткан онлайн сабак шейшемби жана бейшемби күндөрү күндүзгү саат 11:00дөн 12:00гө чейин болуп турат.