Бүгүн Таласта шаардык ички иштер башкармалыгынын демилгеси менен шаардын борбордук көчөлөрүндө кылмыштуулукту, укук бузууларды болтурбоо, алардын алдын алуу боюнча түзүлгөн 2 айлык иш-мерчемдин, “Зомбулуксуз 16 күн” жана 1-декабрь СПИДге каршы күрөшүү күнүнө карата “Биз зомбулукка каршыбыз” аталыштарындагы жөө жүрүү акциясы уюштурулду.
Ага Талас ШИИБдин башчысы Маратбек Шайбеков баштаган кызматкерлер, шаар бийлигинин, облустук үй-бүлөлүк медицина борборунун кызматкерлери, райондор аралык эмгек социалдык камсыздоо жана миграция башкармалыгынын адистери, Талас агрардык-экономикалык, Талас медициналык колледждеринин студенттери, №90 кесиптик лицейдин окуучулары, “Кызыл-Ай” коомунун ыктыярчылары катышты.
Жөө жүрүштүн негизги максаты - өспүрүмдөр арасында гендердик зомбулуктун, эрте никеге туруунун, ар кандай кылмыштардын, укук бузуулардын алдын алуу.
Иш-чара Атай Огомбаев атындагы музыкалык мектебинин алдында жыйынтыкталып, катышуучулар тарабынан позитивдүү флешмоб аткарылды.
Google Play
App Store