Жаңы жылдан баштап дыйкандар менен фермерлер жер салыгынан бошотулат. Тиешелүү жарлыкка Президент Садыр Жапаров кол койду. 

Маалыматка ылайык, 2022-жылдын 1-январынан баштап сугат жер, кайрак жер, жайыт жана чабык жерлерге салык төлөнбөйт. Бул иш өкмөткө жүктөлүп, республикалык казынадан төлөнүп турат. Мындан сырткары, келе жаткан жылы дыйкандар менен фермерлерге жылдык үстөгү 6 пайыз болгон насыялар бериле баштайт. Өлкө башчысы негизги максат дыйкандарга шарт түзүп, мамлекетти тамак-аш коопсуздугу менен камсыз кылуу экендигин белгилейт. 

Буга чейин жерлердин көпчүлүк бөлүгү айдалбай, эч нерсе себилбей келген болсо, мындан ары сугат жерлерди иштетүүгө өзгөчө көңул бурулат. Жергиликтүү бийликтегилер - айыл өкмөт, аким, президенттин облустардагы өкүлдөрү, бул маселеге керт баштары менен жооп бере тургандыктарын мамлекет башчысы кошумчалайт.