Республикалык маанидеги бардык ашууларда жана жолдордо тайгакка каршы инерттүү материалдарды кошуп себүү иштери жүргүзүлүүдө. 

Транспорт министрлигинин басма сөз кызматы билдиргендей, 18-ноябрга караган түнү жол кызматкерлери Боом капчыгайында үч жолу инерттик материалдарды кошуу иштерин жүргүзүшкөн. Мындан тышкары кар күрткүсү пайда болгон Кемин - Шабдан - Көк-Ойрок жолуна кум-туз аралашмасы кошулуп, себилди. Ушундай эле иштер Бишкек - Ош жолунун Төө-Ашуу ашуусунда, Талас - Тараз - Суусамыр унаа жолунда да жүргүзүлдү. 

Төө-Ашууда жол кырсыктарын болтурбоо максатында күнүнө төрт жолу шагыл-кумдуу туз төгүлүп жатат. Ошондой эле, Сосновка постунда жайкы дөңгөлөктөрдү кышкы дөңгөлөккө алмаштыруу боюнча түшүндүрүү иштери жүргүзүлүүдө. Мындан сырткары Жалал-Абад облусундагы Ала-Бел, Көк-Бел, Чапчыма, Нарын облусундагы Долон ашууларында жолдордогу муз менен карды эритүү иштери жүргүзүлдү.