Баткен шаарында 28 ишкана менен өнөр жай зонасы курулат. Бул тууралуу Экономика министрлиги билдирди. Маалыматка ылайык, бул үчүн өкмөттүн 2019-жылдын 21-январындагы №617 токтому менен Баткен шаарынын Чет-Булак кварталында жайгашкан 172,9 гектар айыл чарба жерлери "Өнөр жай, транспорт, байланыш, энергетика жана башка багыттагы жерлер" категориясына которулган.

Министрлик Баткен облусу республиканын түштүк-батышында жайгашкан жана сейрек кездешүүчү өнөр жай потенциалына ээ экенин белгиледи.

"Кен иштетүү жана кайра иштетүү ишканаларын өнүктүрүүгө багытталган Баткен облусунун тоо-кен өнөр жайынын минералдык-сырьелук базасы пайдалуу кендердин айрым түрлөрүнүн, биринчи кезекте сымап, сурьма, көмүр, кварц куму ж.б. өнөр жайын өнүктүрүү аймактын социалдык-экономикалык өнүгүүсүнүн артыкчылыктуу багыты болуп саналат", — деп айтылат маалыматта. Облустун өнөр жайын өнүктүрүүнүн негизги милдети жергиликтүү сырьелук базаны натыйжалуу пайдалануу болуп саналат. Билдирүүдө бул облустун тоо-кен тармагын, курулуш материалдар өнөр жайын, тамак-аш жана кайра иштетүү тармагын мындан ары өнүгүшүнө түрткү берери белгиленген.