Мамлекеттер аралык издөөдө жүргөн чет элдик жаранга мыйзамсыз паспорт берүү фактысы аныкталды. Бул тууралуу Финполдун басма сөз кызматы билдирди. 

Маалыматка ылайык, 2018-жылы Өзбекстандын жараны Нематжон Хомидовго Ош облусунун Кара-Суу шаарына каттоого тургузуу менен Кыргызстандын жаранынын паспорту берилген. Ал паспорт алган учурда чет өлкөдө болуп, 7 жылдан бери өлкө аймагына кирбей жүргөнү белгилүү болду. Ички иштер министрлигинин маалыматына ылайык, мамлекеттер аралык издөөдө жүргөн жана Өзбекстанда Жазык-кодексинин “Өзбекстан Республикасынын конституциялык түзүлүшүнө кол салуу” беренеси боюнча соттолгон. 

Бул факт Кыргызстанда Кылмыштардын жана жоруктардын бирдиктүү реестрине Жазык-кодексинин "Паспортту мыйзамсыз берүү" беренесинин негизинде катталды. Мекемеден учурда иш тергелип жаткандыгын жана ушул сыяктуу паспортторду мыйзамсыз берген фактыларды аныктоо боюнча иштер жүргүзүлүп жаткандыгын кошумчалашты.