Бишкекте районду, турак жай массивин, имаратты жана ага чектеш аймакты мыкты жаңы жылдык жасалгалоо үчүн мэриянын салтка айланган сынагы башталды. Бул тууралуу шаардык муниципалитеттин басма сөз кызматы билдирди.

Анын айтымында, сынак жаңы жылдык маанайды түзүү, ошондой эле шаардын, көчөлөрдүн, аянттардын, имараттардын жана курулмалардын майрамдык жасалгаланышына колдоо көрсөтүү максатында өткөрүлүп жатат.

Бишкек мэриясынын административдик райондору, министрликтер, ведомстволор, мекемелер, менчигинин түрүнө карабастан ишкердик субъекттери, жеке ишкерлер, соода борборлору жана короолор катыша алат.

Сынак төмөнкү номинациялар боюнча өткөрүлөт:

• "Райондун жаңы жылдык мыкты жасалгалоосу";

• "Бишкектеги жаңы имараттардын Жаңы жылдык мыкты жасалгалоосу";

• "Жаңы жылдык короодогу мыкты жасалгалоо";

• "Министрликтердин жана административдик ведомстволордун имараттарынын фасаддарын жана ага жакын жайгашкан аймактарды Жаңы жылдык мыкты жасалгалоо";

• "Соода жана тейлөө мекемелеринин, кеңселердин жана башка объектилердин фасадын жана ага чектеш аймакты Жаңы жылдык мыкты жасалгалоо";

• "Фасаддарды жана ири соода борборлорунун, борборлордун жана базарлардын жанындагы аймактарды Жаңы жылдык мыкты жасалгалоо."

Сынакка катышуу үчүн, 2020-жылдын 31-декабрына чейин электрондук почтага сүрөттөрдү жөнөтүшүңүз керек: байланыш маалыматтарын милдеттүү түрдө көрсөтүү менен konkurs@meria.kg.

Ар бир катышуучудан алардын тартылган датасын көрсөтүү менен бешке чейин сүрөт кабыл алынат. Сүрөттөр ачык-айкын болуп, аймактын жасалгаланышын, JPEG форматында, көлөмү 1 мегабайтка чейин болушу керек. Суроолор боюнча 0312611091 номерине чалыңыз.