Ысык-Көл облусундагы Каракол мамлекеттик жаратылыш паркы заманбап санарип ыкмага өттү. Эми паркка кирүү электрондук система аркылуу ишке ашат.

Жаңы система паркка келген туристтер менен жаратылышты сүйүүчүлөргө ыңгайлуу шарт түзүп, узун кезектерди жана накталай төлөм маселесин жоёт. Кирүү акысын онлайн түрүндө же QR-код аркылуу төлөөгө болот.

Парк администрациясынын маалыматына ылайык, бул кадам экотуризмди өнүктүрүүгө жана туристтик кызмат көрсөтүүлөрдү автоматташтырууга багытталган. Электрондук система аркылуу ар бир коноктун кирүүсү катталат, бул болсо коопсуздукту жогорулатат жана жаратылыш аймагын башкарууну жеңилдетет.

Каракол жаратылыш паркы — Кыргызстандагы эң кооз экотуристтик жайлардын бири. Анын аймагында муздак булактар, альп пейзаждар, сейрек кездешүүчү өсүмдүктөр менен жаныбарлар бар. Жыл сайын бул жерге миңдеген жергиликтүү жана чет элдик туристтер келишет.

Жаңы электрондук система — өлкөдөгү экотуризмди санариптештирүү багытындагы маанилүү кадамдардын бири.