УКМК Саламаттыкты сактоо тармагындагы коррупцияны аныктоо жана ага бөгөт коюу боюнча көрүлгөн чаралардын натыйжасында Эмгек, социалдык коргоо жана миграция министрлигине караштуу медициналык-социалдык эксперттик комиссиясы тарабынан майыптык тобун аныктоодогу  коррупциялык схеманы аныктады. Тактап айтканда, Лейлек райондор аралык медициналык-социалдык эксперттик комиссиянын мүчөлөрү ден соолугунун мүмкүнчүлүктөрү чектелүү адамдардын майыптык тобун аныктап берүү үчүн системалуу түрдө акча талап кылуу менен алектенген.

Баткен районунун тергөө судьясы тарабынан санкцияланган атайын тергөө иш-аракеттеринин натыйжасында козголгон кылмыш ишинин алкагында Лейлек райондор аралык медициналык-социалдык эксперттик комиссиянын төрагасы, эксперт А.Ж.А. жана врач-эксперт Э.У.Б. тарабынан ден соолугунун мүмкүнчүлүгү чектелген жарандардан 3 миң сомдон 5 миң сомго чейинки өлчөмдөгү акча каражатын системалуу түрдө алгандыгын тастыктаган материалдар алынды.

Мындан улам жогоруда аталган жарандар Кылмыш-жаза кодексинин 209-беренесинин 4-бөлүгүнүн 4-пунктунда каралган кылмышка шектүү катары УКМКнын убактылуу кармоочу жайына  камакка алынып, тергөө-ыкчам иш-чаралар жүргүзүлүүдө.