Нарында издөөгө алынган 66 жаштагы жарандын сөөгү саздан табылды. Бул тууралуу ӨКМден билдирди. 

Маалыматка ылайык, ал Жумгал районуна караштуу Байзак айылынын тургуну болгон. Туугандары аны 24-февралда үйдөн ат минип чыгып кеткен бойдон дайынсыз экенин айтып, 28-февралда ӨКМдин куткаруу кызматына кайрылган. 

Жумгал райондук куткаруучулар тартылып, туугандарынын көрсөтмөсү менен Жумгал суусунун жээктеринен издөө ишин жүргүзүшкөн. Издөөнүн жыйынтыгында 4-март күнү изделген жарандын сөөгү сазда минген аты менен кошо тыгылып калган абалда табылган.

Куткаруучулар жаранды жана минген атынын жансыз денесин саздан алып чыгышып, ИИМдин кызматкерлерине өткөрүп беришти.