Жалил Атамбаев УКМКга суракка чакырылды. Ага карата катаал чара көрүлөт. Ишкер Жалил Атамбаевдин уулунун миңдей адам катышкан үлпөт тою боюнча текшерүү иштери башталды.

УКМКнын басма сөз кызматы билдиргендей, той 12-декабрда Ош шаарында өткөн. «Массалык иш-чараларды жана тойлорду өткөрүүгө чектөө киргизилгенине карабастан, ишкер бизнесмен Жалил Атамбаев 1 миңдей адамдын катышуусунда үлпөт той өткөргөн. Ошону менен катар санитардык-эпидемиологиялык талаптар одоно бузулуп, коомчулуктун нааразычылыгын жаратты», - деп айтылат маалыматта.

Андан тышкары Жалил Атамбаевдин уулу УКМКнын учурдагы кызматкери экени белгилүү болду. Ошондуктан ага карата кызматтык иликтөө башталды. «Анын жыйынтыгында кызматтан алууга чейин тиешелүү чара көрүлөт», - деп билдирди УКМКдан. Ошондой эле Жалил Атамбаев УКМКнын Тергөө кызматына аталган окуянын бардык жагдайларын териштирүү үчүн суракка чакырылды. «Ага карата дагы эң катаал чара көрүлөт», - деп айтылат маалыматта.