Бажы кызматынын төрагасынын мурдагы орун басары Райымбек Матраимов экономикалык мунапыстын алкагында Каржы министрлигинин депозиттик эсебине 9-декабрга карата жалпы 807,3 млн сом которду. 

Министрлик тараткан маалыматка ылайык, экономикалык мунапыстын алкагында ачылган депозиттик эсепке 9-декабрга карата жалпы 912,1 млн сом түштү. "Ал эми кечээ, 8-декабрга карата эсепке жалпы 872,1 млн сом түшсө, анын 773,4 млн сому Матраимов тарабынан которулган", - деп айтылат маалыматта. Эскерте кетсек, 21-октябрда Садыр Жапаров Кыргызстанда 30 күндүк экономикалык мунапыс жарыяланган. 

20-октябрда бажы органдарындагы коррупция фактысы боюнча мамлекеттик бажы кызматынын төрагасынын мурунку орун басары Райымбек Матраимов УКМКнын имаратына алынып келинген. Жүргүзүлгөн тергөө иш-чараларынын алкагында Матраимовдун кылмыштуу иш-аракеттеринин жыйынтыгында республикалык бюджетке алдын ала 2 миллиард сомго жакын чыгым келтирилгендиги аныкталган. Ал алгач 80 миллион сом өлчөмүндөгү акча каражатын УКМКнын депозиттик эсебине которгон.