Милиция кайгуул кызматы интернетте түз эфирде тапанчасын көрсөтүп, жаман сөздөрдү сүйлөгөн адамды кармады. Маалым болгондой 3-декабрда "Инстаграм" социалдык түйүнү аркылуу белгисиз жаран колуна курал кармап, түз эфирге чыгып, ыпылас сөздөрдү сүйлөп жаткандыгы тууралуу видео тараган. 

Маалымат жарыяланаары менен кайгуул кызматкерлери ыкчам издөө иш-чараларын жүргүзүп, натыйжада мыйзамсыз курал алып жүргөн 1995-жылы туулган жаран кармашып, аны Биринчи май райондук ИИБнын Тергөө кызматына өткөрүшүп беришкен. 

Тактоо учурунда жаран бул видеону 1-декабрда Байтик Баатыр жана Медеров көчөлөрүндө түшүргөнү белгилүү болгон. Бул факты Кылмыштардын жана жоруктардын бирдиктүү реестрине катталып, жазык кодексинин "Куралды, ок-дарыларды мыйзамсыз жүгүртүү" беренесинин негизинде сотко чейинки өндүрүшкө алынды.