Бишкекте эксперименталдык  инфекциялык оорукананын курулушу сентябрдын аягында аяктайт. Бул тууралуу Мамлекеттик курулуш комитетинин директорунун орун басары Уланбек Калманбетов билдирди.

Анын айтымында, имарат үч бөлүктөн: жандандыруу бөлүмү, биринчи жана экинчи медициналык бөлүмдөрүнөн турат. Оорукана 100 орунга ылайыкташтырылган.

Бардык блоктордо фундамент, шыпты изоляциялоо, ички канализация, пол устундары жана чарбанын металл конструкциялары  бүттү.  Ички бөлүктөрдө электр иштери жана башка жумуштар боюнча иштер жүрүп жатат. Бөлүмдөрдө  2-3 орундуу палаталар бар.

«Курулушка болжол менен 60 миллион сом бөлүнгөн. Бүгүн курулуштун 41-күнү, аны сентябрдын аягына чейин бүтүрүүнү пландап жатабыз. Учурда 7 саламаттыкты сактоо объектиси пайдаланууга берилди », - деп белгиледи Калманбетов.