Ат‑Башы районунун Түз‑Бел аймагында жаңы 10 МВА кубаттуулуктагы 110/35 кВ “Коргон Таш” көмөк чордонунун ачылыш аземи болду. Иш-чарага энергетика министри Таалайбек Ибраев катышып, обьекттин өлкөнүн энергетикалык коопсуздугу үчүн маанилүүлүгүн белгиледи.

Министр Ибраев өз сөзүндө “Коргон Таш” долбоору өлкө башчынын аймактарды өнүктүрүү жана энергетикалык коопсуздукту бекемдөө багытындагы планынын негизинде ишке ашканын айтты:

“Президент Садыр Жапаров баштаган мамлекеттик өнүгүү саясатынын алкагында өлкөбүздүн бардык булуң‑бурчунда, анын ичинде Нарын облусунда да ири энергетикалык долбоорлор жүзөгө ашууда. ‘Коргон Таш’ көмөк чордону — ошол иштердин бири. Бул объект Кытай–Кыргызстан темир жолунун курулушун сапаттуу энергия менен камсыздап, жалпы аймактын инфраструктуралык өнүгүшүнө түрткү болот,” — деди Таалайбек Ибраев.

Курулуш иштери белгиленген мөөнөттө толук аякталып, эми “Коргон Таш” чордону 10 МВА кубаттуулугу менен үзгүлтүксүз иштөөгө даяр. Анын негизги максаты — Темир жолго зарыл болгон электр энергиясын коопсуз жана туруктуу жеткирүү.

Жаңы көмөк чордондун эксплуатацияга кириши менен региондогу энергетикалык булактарды диверсификациялоого жана транспорттук-транспорттук инфраструктураны чыңдоого кошумча мүмкүнчүлүк түзүлдү. Бийлик өкүлдөрү муну аймактын өнүгүүсүнө чоң салым деп баалашууда.