Улуттук банк эсептик  ченди өзгөртпөстөн, 9 %  деңгээлинде сактап калуу чечимин кабыл алды. Бул чечим 2025-жылдын 27-майынан  тарта күчүнө кирет. Бул тууралуу мекеменин басма сөз кызматы кабарлады.

Маалыматка ылайык, чечим инфляциянын салыштырмалуу  туруктуу деңгээлде сакталышы жана өлкөдөгү экономикалык активдүүлүктүн өсүшү  менен байланыштуу.

2025-жылдын январь-апрель айларында ички дүң продукциянын  өсүшү 11,7% болуп, негизинен кызмат көрсөтүү, курулуш жана өнөр жай  тармактарынын өсүшү менен шартталган.

Инфляция жыл башынан бери 2,9%га жогорулап, жылдык  көрсөткүч 7,7% деңгээлинде калыптанды. Бул негизинен электр энергиясы жана айыл  чарба продукцияларына болгон сезондук баалардын көтөрүлүшү, ошондой эле ички  керектөө жана инвестициялардын көбөйүшү менен түшүндүрүлөт.

“Эсептик ченди туруктуу сактоо – инфляцияны көзөмөлдөп,  макроэкономикалык туруктуулукту камсыздоо үчүн маанилүү кадам. Эгер  тобокелдиктер жаралса, ченге өзгөртүү киргизилиши мүмкүн,” — деп билдирет  Улуттук банк.

Эсептик чен боюнча кийинки чечим 2025-жылдын 28-июлунда  каралат.