Чүй облусунун Жайыл районунда балык уулоого чыгып, дайынсыз болуп жаткан 28 жаштагы жаранды издөө иштери уланууда.

Өзгөчө кырдаалдар министрлигинин маалыматына ылайык, 23-майда жүргүзүлүп жаткан издөө иштерине жалпы 17 куткаруучу тартылган. Алардын ичинен 8 куткаруучу Жайыл райондук №22 өрт-куткаруу бөлүгүнөн, 6 куткаруучу Нарындагы Жумгал районунун №43 бөлүгүнөн жана 3 куткаруучу №44 бөлүктөн келди. Издөө иштерине дрон да тартылган.

19-май күнү болжол менен саат 19:00 чамасында 1997-жылы туулган жигит Көкөмерен дарыясына балык уулоого чыгып кеткен бойдон дайынсыз болуп жаткандыгы кабарланган. Анын кайырмагы суунун жээгинен табылган.

Издөө иштери уланууда. Кошумча маалымат берилет.