Соңку маалыматтарга караганда, акыркы бир күндүн ичинде коронавирустан 59 бейтап айыгып, ооруканадан чыгарылды. 

Илдеттен сакайгандардын жалпы саны 82 938 же 96,6 %ды түзөт. Ошол эле учурда, коронавирус жуктурган жаңы 24 учур катталды. Тумоого чалдыккандардын көбү борбор калаанын тургундары. Алсак, Бишкектен 12, Чүй, Ош облустарынын 3төн, Нарындан 4 жана Баткенден 2 адам илдет жуктуруп алган. Бүгүнкү күндө үй шартында 309 адам, стационарларда 379 бейтап дарыланууда. 

Алардын 90у оор абалда, 20 бейтап өтө оор деп бааланса, 264 адам орто оордукта, ал эми 5 бейтап канаттандыраарлык абалда. Бүгүн коронавирустан каза болгондор катталган жок. Өлкөдө пандемия башталгандан бери КОВИД-19 жуктургандардын жалпы саны 86025ге жетти. Тилекке каршы 1464 адам каза болду.