Аталардын эрдиги менен биримдиги аркылуу келген Улуу Жеңиштин 75 жылдыгына карата ардагерлер туурасындагы баяндардын түрмөгүн улантабыз.

Согуш ардагери Абдисамат Сулайманов 95 жашта. Баскан-турганы тың, адамдар менен баарлаша билип, эс -тутуму мыкты. Кайратынан жана чапчаң аракетинен али жанбаган карыянын согуш талаасындагы окуялары айы-күнү менен бүгүнкүдөй эсинде. Бир үй-бүлөдөгү Сулаймановдордун улуусу - атасы кан майданга биринчилерден болуп чакыртылган. Эки агасынан соң, үйдүн кичүүсү Апсамат Сулайманов, 1944-жылы 19 жашында майданга жөнөп кеткен. Бир катар ири шаарларды бошотууга катышкан баатырдыгы үчүн орден, медалдар менен сыйланган. Жеңишти Москвада тоскон.