Чүй облусунда жаңы ишканалар ачылып, жаңы жумуш орундары түзүлдү. Сокулук, Аламүдүн жана Ысык-Ата райондорун кыдыруу учурунда мамлекеттик бюджеттен жана башка каржылоо булактарынан бөлүнгөн каражаттар таза сууну, ирригациялык каналдарды жана ооруканаларды оңдоп-түзөө иштерине сарпталып жатканына "Ала-Тоо 24" каналынын чыгармачыл тобу күбө болду.

Жерге төшөлүүчү таштамандарды даярдап чыгаруучу бул цех Кант шаарында 4 жылдан бери иштеп келет. Бул ишканада бардыгы болуп 30 киши эмгектенет, 22си жергиликтүү жашоочулар болсо, 8и чет элдиктер. Дээрлик бардыгы табигый таштардан жасалган жасалгалар Казакстанга жана Россияга экспорттолот.

Ысык-Ата районунун Сары-Жон айылынын жашоочулары үчүн таза суу маселеси негизги көйгөйлөрдөн болчу. Жакында донорлордун жардамы менен суу сактоочу тутум калыбына келтирилди. Эми бир айдан ийин Сары-Жон айылынын тургундарына таза суу бериле баштайт.


Региондорду өнүктүрүү жана санариптештирүү жылынын алкагында Ысык-Ата районунун 19 айыл аймагы жана 47 мектеби интернетке туташтырылган. Ал эми 17 үй-бүлөлүк дарыгерлер тобуна Швейцария элчилиги көмөк көрсөтүп, ноутбуктарды жана 28 компьютер сатып беришкен.