Ат-Башы районунда социалдык келишим долбоору менен алектенген үй-бүлөлөрдүн бизнес форуму өттү. Форум Эмгек, социалдык камсыздоо жана миграция министрлигинин түзүлгөндүгүнүн 100 жылдыгына арналды.

Иш-чарага район боюнча социалдык келишим долбоору менен ишкерлик баштаган  646 үй-бүлө чакырылган. Булардын ичинен 45 үй-бүлө чоң ишкерлик менен алектенсе, үч үй-бүлө жылдык кирешесин миллион сомго жеткирген. Алардын ичинен  Перизат Кемелова Бириккен Араб Эмираттарына жана Кыргызстандын бардык облустарына сүттөн жасалган азыктарын экспорттоого жетишкен.

Перизат Кемелова 2022-жылы 100 миң сом алып, кондитер азыктарын жасоо үчүн электр мешин сатып алган. Даярдаган азыктарын райондогу дүкөндөргө таратып, тез эле жогорку суроо-талапка ээ болгон. Андан соң райондун Талды-Суу, Өзгөрүш жана 1-Май айылдарынан сүт алып, сүт азыктарын даярдай баштаган. Учурда ал сүттү кайра иштетүү жана кондитер азыктары менен эки багытта ишкерлик кылып, жылдык кирешесин бир миллион сомго жеткирген. 

Ишкер Соода өнөр жай палатасына мүчө болуп кирип,  даярдаган азыктарын экспортко чыгаруу үчүн атайын сертификат алып, учурда өлкөнүн бардык аймагына  “Пери” бренди менен чыгарып жатат. Ошондой эле сары май менен менен курутту Дубайга экспорттоп жатат.  Мындай өндүрүштө учурда беш жумуш орду түзүлгөн. Ишкерликти дагы кеңйтүү максаты менен учурда атайын имарат салдырып жатат. 

Форум алкагында долбоор менен ишкерлик баштагандар өндүргөн продукцияларын көргөзмөгө коюп, тажырыйба алмашуу болду. 

Быйыл район боюнча 173 үй-бүлө менен келишим түзүлүп,  алардын 123ү каражатын алган. Маалыматка караганда, учурда дагы райондо жөлөк пул алуучу 669 аз камсыз үй-бүлө бар.