Президент Садыр Жапаров бүгүн, 31-августта, Кытай Эл Республикасына болгон иш сапарынын алкагында Кытай Эл Республикасынын Төрагасы Си Цзиньпин менен Тяньцзинь шаарында жолугушту. 

Эки өлкөнүн лидерлери эки тараптуу жана көп жактуу күн тартибиндеги негизги маселелер, анын ичинде ШКУнун алкагындагы өз ара аракеттенүү келечеги, логистикалык инфраструктураны өнүктүрүү жана чек арадагы өткөрүү пункттарынын ишинин натыйжалуулугун жогорулатуу, ошондой эле финансылык, маданий-гуманитардык, соода-экономикалык жана инвестициялык кызматташтыкты мындан ары чыңдоо боюнча пикир алмашышты. 

КЭР Төрагасы Си Цзиньпин Мамлекет башчысын тосуп алып, тараптар жыл башынан бери эки жолу жолугушуу өткөрүп, анда эки жактуу мамилелерди өнүктүрүү пландары аныкталганын жана кызматташуу маселелери боюнча кеңири өз ара түшүнүшүүгө жетишилгенин белгиледи. 

Кытай лидери Садыр Жапаровду жана кыргыз элин Эгемендүүлүк күнү менен куттуктап, өлкөгө гүлдөп-өсүү жана бакубатчылык каалады. Ал өнүгүү стратегияларын тереңдетүүгө жана модернизация жолунда бирге жылууга даярдыгын билдирди. Президент Садыр Жапаров өз кезегинде Си Цзиньпинге жана Кытай Өкмөтүнө Кыргызстандын эгемендүүлүк алгандан берки күндөрдөн тарта өлкөгө тынымсыз көңүл буруп, экономикасын өнүктүрүүгө үзгүлтүксүз жардам берип келгени үчүн ыраазычылык билдирди. Ал Садыр Жапаровдун Кытайга болгон мамлекеттик сапарынын жана Казакстандагы июнь айындагы жолугушуулардын жүрүшүндө жетишилген бардык макулдашуулар ырааттуу түрдө жүзөгө ашырылып жатканын, бул эки тараптуу мамилелерди, достукту жана ынак коңшулаштыкты өнүктүрүүдө жаңы маанилүү ийгиликтерге жол ачарын белгиледи. Бул контекстте Садыр Жапаров Си Цзиньпинди 2026-жылы Кыргызстанга мамлекеттик сапар менен келүүгө чакырып, кызматташтыктагы жаңы ийгиликтер бул сапардын символикалык туу чокусу болоруна ишенимин билдирди. 

Жолугушуунун жүрүшүндө Мамлекет башчысы кытай тарапты Кыргызстанда ишке ашырылып жаткан бир катар ири инвестициялык долбоорлор менен тааныштырды. Буга байланыштуу КЭР Төрагасы кытай компанияларын аларды, анын ичинде "Тамчы" атайын каржы-инвестициялык аймагын жана "Ала-Тоо Резорт" туристтик комплексин түзүү долбоорлорун ишке ашырууга чакырууга даяр экендигин билдирди. Тараптар эки өлкөнүн элинин жыргалчылыгы үчүн өз ара ишенимге жана сый-урматка негизделген стратегиялык өз ара аракеттенүүнү мындан ары да өнүктүрүүгө умтуларын билдиришти. 

Жолугушуунун жыйынтыгында бир катар документтерге кол коюлду:

1. Кыргыз Республикасынын Министрлер Кабинети менен Кытай Эл Республикасынын Өкмөтүнүн ортосундагы кайтарымсыз жардам көрсөтүү жөнүндө макулдашуу; 

2. Кыргыз Республикасынын Министрлер Кабинети менен Кытай Эл Республикасынын Өкмөтүнүн ортосундагы кат алмашуу жолу менен түзүлгөн "Бедел" автомобиль өткөрүү пунктун куруу жана техникалык жабдуу" долбоорунун техникалык-экономикалык негиздемесин жүргүзүү жөнүндө макулдашуу; 

3. Кыргыз Республикасынын Суу ресурстары, айыл чарба жана кайра иштетүү өнөр жайы министрлиги менен Кытай Эл Республикасынын Башкы бажы башкармалыгынын ортосундагы Кыргыз Республикасынан Кытай Эл Республикасына экспорттолуучу кургатылган жемиштерге карата инспекциялык, карантиндик жана санитардык талаптар жөнүндө протокол; 

4. Кыргыз Республикасынын Министрлер Кабинетине караштуу Жарандык авиация мамлекеттик агенттигинин алдындагы «Кыргызаэронавигация» мамлекеттик ишканасынын Бишкек райондук диспетчердик борбору менен Кытайдын Жарандык авиация башкармалыгынын Синьцзян аба кыймылын уюштуруу бюросунун Үрүмчү райондук диспетчердик борборунун ортосундагы Макулдашуу каты; 

5. «Кытай–Кыргызстан–Өзбекстан» темир жол долбоорундагы Кыргыз Республикасынын үлүшүн каржылоо үчүн жеңилдетилген насыя берүү жөнүндө ниет кат; 

6. Чүй облусу (Кыргыз Республикасы) менен Ганьсу провинциясынын (Кытай Эл Республикасы) ортосунда боордоштук мамилелерди түзүү жөнүндө меморандум; 

7. Кыргыз Республикасынын Министрлер Кабинетине караштуу Мамлекеттик кызмат жана жергиликтүү өз алдынча башкаруу иштери боюнча мамлекеттик агенттиги менен Кытай Эл Республикасынын Эл аралык кызматташтык жана өнүктүрүү боюнча мамлекеттик агенттигинин ортосундагы адам ресурстарын өнүктүрүү жаатында кызматташтыкты чыңдоо боюнча өз ара түшүнүшүү жөнүндө меморандум; 

8. Кыргыз Республикасынын Улуттук телерадиокорпорациясы менен Кытай Медиакорпорациясынын ортосунда гуманитардык алмашуу боюнча биргелешкен иш-чараларды өткөрүү боюнча ниеттер жөнүндө протокол; 

9. Кыргыз Республикасынын Улуттук телерадиокорпорациясы менен Кытай Эл Республикасынын "Синьхуа" маалымат агенттигинин ортосундагы жаңылыктар жаатында кызматташуу боюнча өз ара түшүнүшүү жөнүндө меморандум; 

10. Кыргыз Республикасынын Экономика жана коммерция министрлигине караштуу Стандартташтыруу жана метрология борбору (Кыргызстандарт) менен Кытай Эл Республикасынын Базарды көзөмөлдөө жана жөнгө салуу боюнча башкы мамлекеттик башкармалыгынын (SAMR) ортосундагы өз ара түшүнүшүү жөнүндө меморандум.