Президент Садыр Жапаров бүгүн, 30-августта Жалал-Абад шаарында облустук бийликтин жаңы административдик имаратынын салтанаттуу ачылышында өлкө элин Эгемендүүлүк күнү менен куттуктады. 

Сөзүнүн соңунда өлкө башчысы Жалал-Абаддагы жаңы аянтты “Азаттык” аянты деп атоо чечими кабыл алынганын билдирди. 

- Ушул аянт, жаңы имарат салынган жер мурда түрмө болчу. Аянты 10 гектардай. Биз түрмөнү башка жака көчүрүп, анын ордун сүрүп салган соң ушул имаратты, аянтты курдук. Эми ушул жаңы аянтты “Азаттык” аянты деп атоону чечтик. Ошол көчүрүлгөн түрмөдө отурган жарандарыбыз да эртерээк азаттыкка чыгып, үй-бүлөсүнө, жакындарына, эли-журтуна кошулуусун тилейли. Ушул аянтты мындан ары “Азаттык” деп атайбыз.

 Жалал-Абад шаарында облустук бийликтин жаңы административдик имаратынын курулушу бир жыл мурда башталып, быйылкы эгемендик майрамына чейин бүтүрүү милдети коюлган эле. Эми 31-август – Кыргызстандын Эгемендүүлүк күнүн утурлай, 30-августта анын ачылыш аземи болду.