“Ушул темп менен кетсек өлкөбүз таанылгыс болуп өзгөрөт”, - деп билдирди Кыргызстандын Германиядагы элчиси, белгилүү саясатчы Өмүрбек Текебаев 30-августта Жалал-Абад шаарында Эгемендик күнүнө арналган салтанатта - облустук бийликтин жаңы имаратынын ачылышы учурунда УТРКнын “Ала-Тоо 24” каналынын кабарчысынын суроолоруна жооп берип жатып. 

Саясатчы андан ары экономикалык өсүүнүн себептерин мындайча чечмеледи:

  - Акыркы жылдардагы экономикалык өсүш жана өнүгүү жол картабыз ушинтип айтканга негиз берет. Белгилүү болгондой, Орусия-Украина конфликти башталгандан бери дүйнө өзгөрдү. Экономикалык байланыштар, товар менен финансылык агымдар... айтор көп нерсе өзгөрдү. Ушундай учурда Кыргызстандын жетекчилигинин милдети – андан болушунча, максимум пайдаланып калуу керек болчу. Ал үчүн коркпогон, тартынбаган, интуициясы күчтүү адамдар керек эле. Ушундай учурда Кыргызстандын башында ошондой адамдар туруп, өлкө ошол кырдаалдан максимум пайдаланды. Ошонун натыйжасында Кыргызстанда экономикалык өсүү болуп отурат. Бирок ушул конфликт бүтсө эле токтоп калбай, өсүш андан ары улануусу керек. Ал үчүн эмне кылуу керек? Мына трансулуттук темир жол курулууда. Бул курулуш дагы биздин экономикага бир канча пайыз өсүш кошот. Жол бүтсө ал туруктуу болуп калат. Башка дагы инфраструктуралык курулуштар, Камбар-Ата-1 ГЭСинин курулушу да бир канча пайыз өсүш кошот. Бүтүп калса ал да туруктуу болуп калат. Ошентип ушундай темп менен биздин экономика өсө берет. 10-15 жыл ушундай темп менен кетсек өлкөбүз таанылгыс болуп өзгөрөт. Тез өнүккөн өлкөлөрдүн тарыхы буга далил...