“Билим берүүнүн түзүмү гана эмес, мазмуну да өзгөрөт. Жаңы мектептер, жаңы окуу китептери, жаңы усулдук программалар менен катар эмгек акыны дагы көтөрөбүз”, - деп белгиледи Кыргыз Республикасынын Президенти Садыр Жапаров бүгүн, 29-августта, Ош шаарындагы В. Терешкова атындагы жатак-мектебинин жаңы имаратынын ачылыш аземинде.
Мамлекет башчысынын сөзү:
“Меймандос Ош шаарынын урматтуу тургундары!
Билим уясынын ачылышына онлайн катышып жаткан урматтуу Валентина Владимировна жана Россиядан келген ардактуу меймандар!
Мен өлкөбүздүн билим берүү тармагында кандайдыр бир жакшы саамалык болсо, ар дайым кубана турганымды айтып келем.
Бүгүн биринчи космонавт-айым, Советтер Союзунун Баатыры Валентина Терешкованын ысымын жарым кылымдан ашуун мезгилден бери алып келаткан бул жатак-мектептин түп-тамырынан бери кайрадан курулуп бүтүп, колдонууга берилип жатканына абдан сүйүнүп турам.
Валентина Владимировна, Сизге жана Россия Федерациясынан келген жоон топ делегация өкүлдөрүнө биздин дарегибизге айткан жылуу сөздөрү жана көрсөткөн колдоолору үчүн чоң ыракмат айтам. Валентина Владимировна, сиз 1978–1979-окуу жылында бул мектептин ишмердүүлүгү менен таанышып кеткен экенсиз. Бул ирет ысымыңызды алып жүргөн билим уясынын заман талабына ылайык жаңыртылып жатканына онлайн түрүндө күбө болуп олтурасыз. Сизге терең ыраазычылыгыбызды билдиребиз. Балким, кийинчерээк убактыңыз туура келген учур болуп калса, келип кетерсиз. Ысымыңызды кастарлап алып жүргөн мектеп Сизди кучак жайып тосуп алууга ар дайым даяр!
Сөзүмдүн башында, эки күндөн кийинки Эгемендик майрамыбызды утурлаган бүгүнкү билим берүү жаатындагы жакшынакай саамалык менен жалпыңыздарды чын дилимден куттуктаймын. Жаңы билим уясынын мындан аркы сапары байсалдуу болсун!
Мектептин тарыхына көз чаптыра турган болсок, 1964-жылы курулуп бүткөн мектепке андан бир жыл мурун космосту багындырган Валентина Владимировна Терешкованын ысымы ыйгарылган. Бул окуу жайы башынан эле Кыргызстандын түштүк аймагындагы тоолуу райондордо жашаган, көп балалуу жана аз камсыз болгон, ошондой эле турмуштук оор шартта жашаган үй-бүлөлөрдүн балдарынын сапаттуу билим алуусун камсыз кылууга багытталган жападан жалгыз жатак-мектеп болгон.
Бул мектептин тарых-таржымалы мамлекеттин балдарга болгон камкордугун, коомдун келечек муундарына болгон жоопкерчилигин чагылдырып турат.
Жалпы 720 окуучуга ылайыкташтырылган бул билим берүү мекемеси өзүнүн тарыхында миңдеген бүтүрүүчүлөрдү тарбиялап, өлкөнүн ар кандай тармактарында эмгек өтөгөн көрүнүктүү инсандарды: Жогорку Кеңеш депутаттарын, министрлерди, коомдук, саясий, маданий ишмерлерди жетилткен. Жатак-мектептин бүтүрүүчүлөрү алган билиминин жана тарбиясынын негизинде коомго пайдалуу жаран болуп жетилгендигин айгинелеп турат.
Алардын бири - Кыргыз Республикасынын Баатыры, ушул интернаттын бүтүрүүчүсү Ташиев Камчыбек Кыдыршаевич 2022-жылдын май айында окутуу жүргүзүүгө жараксыз деп табылган бул жатак-мектептин имараттарынын баарын сүрдүрүп, биргелешип чечим кабыл алынып, жаңыдан куруу иштерин баштаган. Мына бүгүн, өзүңүздөр көрүп тургандай, 700 орундуу окуу имараты жана 500 орундуу жатакана толугу менен курулуп бүттү. Бүгүнкү күндө мектеп-интернат 2,3 гектар жерде жайгашып, балдардын заманбап шартта билим алуусуна жана жашоосуна толук мүмкүнчүлүктөр түзүлдү.
Урматтуу агайын-туугандар!
В.Терешкова атындагы жатак-мектеби билим берүү жана социалдык колдоо системасында маанилүү ролду ойноорун баса белгилеп айта кетейин. Бүгүнкү күндө бул чөлкөмдөгү ар кандай шартта жашаган таланттуу балдарыбыздын талантын ачып, өркүндөтүп, билимге умтулган жаштарыбызга терең билим берип, жөндөмүнө жараша кесипке үндөп, жаркын келечегине өбөлгө түзөрүнө бекем ишенем.
Учурдан пайдаланып, мектеп жамаатын жаңы билим ордосу менен куттуктаймын! Силер окуткан балдардын арасынан мындан ары дагы мамлекетибиздин социалдык-экономикалык өнүгүүсүнө салымын кошкон, эл үчүн ак кызмат кылган мыкты инсандар чыксын!
Жалпы мугалимдер, тарбиячылар жамаатына албан-албан жетишкендиктерди каалайм!
Эми урматтуу кыргызстандыктар!
Билим уясында туруп, мамлекеттин жалпы билим берүү тармагында болуп жаткан өзгөрүүлөргө азыноолак токтоло кетпесем болбос.
Бүгүнкү күндө биз окуучуларыбыз алып жаткан билимин турмушта пайдалануусуна, кесипке эрте багыт берүүгө басым жасап жатабыз. Өзүңүздөр билгендей, дүйнө тынымсыз, күн сайын өзгөрүп жаткан шартта биз да заман талабына ылайык 150дөн ашуун алдыңкы өлкөнүн өрнөгүн улап 12 жылдык билим берүү системасын өздөштүрдүк жана ал аркылуу окутуунун мазмунун, билим берүүнүн ыкмаларын өзгөртүүгө кириштик. 12 жылдык билим берүүгө өтүүнүн алкагында бүткүл окуу процесси терең каралып жатат: жаңы мамлекеттик билим берүү стандарты кабыл алынып, предметтик стандарт жаңыртылды, заманбап окуу программалары жана окуу-усулдук комплекстери иштелип чыгууда.
Буюрса, билим берүүнүн түзүмү гана эмес, мазмуну да өзгөрөт. Заман талабына жооп берген жаңы окуу китептери киргизилет. Быйыл билим берүү системасын ар тараптуу өзгөртүүгө багытталган улуттук “Алтын Казык” программасынын негизинде билим берүүнүн сапатын жогорулатуу, окуу программаларын модернизациялоо, алдыңкы билим берүү технологияларын киргизүү, мектеп инфратүзүмүн өнүктүрүүгө кадам таштайбыз.
Мугалимдердин жаңы ыкмаларды өздөштүрүшү үчүн кеңири масштабдагы окутуулар жүргүзүлдү. 16 миңге жакын мугалим STEM багыттары боюнча даярдыктан өтүштү. Калган предметтер боюнча 37 миңден ашуун мугалим квалификациясын жогорулатты. 2025–2026-окуу жылына карата мугалимдер үчүн 27 миңден ашык ноутбук даярдалып, мугалимдерге таратылып берилди.
2025-2026-окуу жылына карата жаңы окуу китептерин басып чыгарууга мамлекет тарабынан 744 млн сом бөлүнгөн. Жалпы билим берүү уюмдарынын китеп фонддору үч окуу жыл аралыгында этап-этабы менен 12 жылдык программага ылайык толук жаңыртылат.
Урматтуу агай-эжейлер, жалпы мугалимдер жамааты!
Өлкөнү алдыга жылдырууда кесипкөй адистердин баасы-баркы күн сайын өсүп барат. Айтайын дегеним, кесипкөй адистерди чыгаруунун башаты мектептерде, башкача айтканда, мына сиздердин колуңуздарда. Мына ошондуктан мугалимдер коомдон бир нече кадам алдыда турушу зарыл. Күн сайын изденүү, саат сайын жаңылануу, билимиңиздерди утур-утур өркүндөтүү аркылуу бүгүнкү балдарыбызга заман талап кылып жаткан тарбия, билим берип, кесипкөйлүккө жол чаап беришиңиздер кажет. Бул – сиздердин кесиптик милдетиңиздер, мугалимдик парзыңыздар!
Ал эми жаркын келечегибиздин тарбиячылары менен мугалимдерине кам көрүү максатында сиздер үчүн бардык шарттарды түзүп берүүгө аракеттенип жатабыз. Заман талап кылган мектептерди куруп, сиздердин катышууңуздарда иштелип чыккан китептерди басып чыгаруудабыз.
Талбай изденген, мекенчил агай-эжейлердин аракети аркылуу балдарыбыздын талант-шыгы ойгонот. Ата-бабаларыбыздан калган нарк-насилди заманбап билим менен жуурулуштуруп тарбия, билим берсеңиздер чыныгы атуулдарды тарбиялап чыгасыздар. Мына ошол уул-кыздарыбыз Кыргызстанды өнүккөн мамлекеттердин катарына кошот. Албетте, сиздердин мындай ат көтөргүс эмгегиңиздер мамлекет тарабынан татыктуу бааланууга тийиш. Жаңы мектептер, жаңы окуу китептери, жаңы усулдук программалар менен катар быйыл эмгек акыңыздарды дагы көтөрөбүз. Буюрса, мугалимдерибиздин бардык көңүлү мектепте, мектеп окуучуларында болушун толук камсыздайбыз.
Валентина Терешкова атындагы жатак-мектептин кадырлуу эмгек жамааты! Мен айтып жаткан жакшы ой-тилек - максаттар сиздерге да тиешелүү.
Сиздер эмгектенген жатак-мектеп бул чөлкөмдө эң ири жана тарыхый мааниси бар билим берүү мекемелеринин бири болуп саналарын жакшы билесиздер. Бул билим уясы билим берүү менен катар, социалдык колдоо функциясын да так аткарып, айрыкча социалдык жактан аялуу үй-бүлөлөрдүн балдары үчүн чоң мааниге ээ болушу кажет.
Урматтуу окуучулар, силер – жаңы Кыргызстандын жаркын келечегисиңер!
Мектеп тарыхындагы ийгиликтүү бүтүрүүчүлөргө карата түздөнүп, алардын баскан изи менен Ата Мекениңерге ак кызматыңарды арнайсыңар деп силерге чоң үмүт артам.
Дүйнө жүзү тез-тез өзгөрүп жаткан маалда, жасалма интеллект барган сайын өнүгүп жаткан заманда силер акылыңарды өстүрүүдө, ден соолугуңарды чыңдоодо жана келечекке максат коюуда ар тараптуу болушуңар керек. Атаандаштыкка туруштук бере ала тургандай бир нече кесиптин ээси болушуңар шарт.
Башкача айтканда, заман талабына ылайыкташа билүү, өзүңөрдү ар тараптан өстүрүү үчүн көп окушуңар зарыл!
Мен силерге, силердин агай-эжейлериңерге албан-албан ийгиликтерди каалайм!
Кымбаттуу мекендештер!
Мынакей, Кыргызстандын Эгемендигинин 34 жылдыгына карата В.Терешкова атындагы жатак-мектептин ачылышы менен катар 100 социалдык объект бир учурда онлайн ишке киргени турат.
Азыркы глобалдашуу шартында мамлекеттин туруктуу өнүгүүсү анын социалдык саясатынын мазмуну менен сапатына түздөн-түз байланыштуу. Социалдык инфратүзүмдөгү объектилер – мектептер, бала бакчалар, оорукана жана медициналык борборлор, маданий жайлар, спорт комплекстери – коомдун социалдык жана экономикалык өнүгүүсүндө фундаменталдык роль ойнойт. Алар элибиздин жашоо сапатын жогорулатып гана тим болбостон, мамлекеттин социалдык капиталын бекемдейт.
Урматтуу Валентина Владимировна!
Өзүңүз күбө болуп жаткандай, сиздин ысымыңызды алып жүргөн билим уясы менен кошо жүздөн ашуун социалдык объектинин боосун чечип, колдонууга бергени турабыз. Бул саамалыкка сиздин онлайн түрүндөгү катышууңузду жакшыга жоруп, ылайым, биздин жатак-мектебибизден сиздей аты алыска, даңкы далайга кеткен атактуу инсандар чыксын деп тилек кылалы. Урматтуу Валентина Владимировна, сиздин ысымыңыз мектепти ийгиликтерге жетишүүгө ар дайым шыктандырат.
Стратегиялык өнөктөш болгон эки мамлекеттин ынтымагына ортоктош болуп жүрө бериңиз. Сизге дагы бир жолу ыраазычылык билдирем, бар болуңуз!
Ардактуу кыргызстандыктар!
Эгемендик күнүнө карата бир катар социалдык объектилер саналуу көз ирмемдерден кийин ишке кирет. В.Терешкова атындагы жатак-мектеп баштаган социалдык объектилердин ачылышы өлкөбүздүн эгемендигинин чыңдалышына ташталган кадамдардын уландысы болсун!
Жер-жерлерде ишке кирип жаткан социалдык жайларыбыз баарыбызга ак жолтой болсун!
Эгемендигибиздин 34 жылдыгы баарыбызга кут алып келген болсун!”.
