Ысык-Көл облусунун Түп районуна караштуу Каркыра айылында Ж. Асылбаев атындагы жалпы орто билим берүү мектебинин филиалы ишке берилди.

Курулуш иштери 2022-жылдын декабрь айында башталып, башкы подрядчы “Зиар Строй” компаниясы тарабынан аткарылган. Буюртмачы — УКС ДЖГС Госстрой, ал эми долбоорду ОсОО “АСФ-Мирлан” даярдаган. Жалпы тендердик баасы 80 млн 11 миң 770 сомду түзгөн.

Жаңы окуу жайдын кубаттуулугу — 100 орун. Мектеп эки кабаттуу окуу корпусунан жана спорт залынан турат. Учурда бул жерде 48 окуучу билим алып, 12 мугалим эмгектенүүдө. Мындан тышкары, 3 сааттык кыска мөөнөттүү бала бакчага 20 бала тартылган.

Жаңы билим берүү объектиси айыл тургундары үчүн чоң белек болуп, балдардын сапаттуу билим алуусуна жана спорт менен машыгуусуна кеңири мүмкүнчүлүк түзөт.