Ормон-Хан айыл аймагына караштуу Жаңы-Жол айылына соода- логистикалык борбор курулду.  Борбор бүгүн, 29-августта өлкө башчынын аралыктан катышуусунда ачылып, ишке берилет.

Бул үчүн “Тогуз-Булак” участкасынан 12 гектар жер берилген.  Жердин  8,87 гектары трансформацияланып, административдик-аймактык реформанын алкагында айыл өкмөттөргө бөлүнгөн 10 миллион сомго жана жергиликтүү бюджеттен каралган 3,5 миллион сомго керектүү курулуш материалдары алынган.  Жалпы 13 миллион 500  миң сомго курулуш иштери башталып, 100 кВт кубаттуулуктагы бир көмөкчордон орнотулган. Айланасы тосулуп, мал байлоочу жайдын жери түздөлүп, кум төгүлүп, навес салынып, чатыры жабылып, мал байлоочу мамылар орнотулган. 

Мындан сырткары республикалык бюджеттен 15 миллион сом, Кочкор райондук өнүктүрүү фондунан 500 миң сом бөлүнгөн. Ага ветенинардык лабороториянын имараты салынып, электр энергиясы тартылып, айланасына 4 видео көзөмөл орнотулуп, мал түшүрүлүүчү жайлары жасалып жана автоунаа токтоочу жайга кум төгүлүп, административдик имараттын курулушу жүргүзүлгөн. 

Ошондой эле борборго баруучу Көл-Үкөк суусуна көпүрө орнотулган. Мындан тышкары 281 контейнерге ылайыкталган 2 гектар жер аянты аукцион аркылуу жарандарга ижарага берилип, ижара келишимдери түзүлгөн. Мал базар беш миң бодо жана майда жандык батууга ылайыкталган.