Нарын районунун Эки-Нарын айылындагы Куюш көпүрөсү бузулуп, Нарын дарыясына түшүп кеткен жүк ташуучу унаанын ээсин издөө иштери уланууда.
Ага Нарын облустук өзгөчө кырдаалдар башкармалыгынан жана Ак-Талаа райондук бөлүмүнөн 55 куткаруучу, беш дрон, айыл өкмөттөрдөн 100 ыктыярчы,  ички иштер органдарынан 43 кызматкер тартылды. Ыктыярчылардын сегизи атчан.

Издөө иштери Эки-Нарын айылынан баштап Нарын дарыясын бойлой Нарын шаары, Учкун, Куланак айылдары жана Ак-Талаа районунда жүрүүдө. 

13-августта курулуш материал тартып бара жаткан унаа Нарын - Орук-Там жолунун 39-чакырымындагы Куюш көпүрөсүнөн өтүп бара жатканда көпүрө ортосунан бузулуп, унаа сууга түшүп кеткен. 

Транспорт жана коммуникациялар министрлиги бул көпүрө авариялык абалда турганына байланыштуу оор жүк ташуучу машинелерге өтүүгө чектөө коюлганын, бирок айдоочу ага карабастан унаасын көпүрөгө салып жибергенин билдирген. Министрликтин маалыматына караганда, көпүрөнү оңдоого 5-августта тендер жарыяланып, 11-августта өткөрүлгөн.