Ак-Талаа районунун Тоголок Молдо айыл өкмөтүнө караштуу Ак-Кыя айылынын Кыз-Жайлоо токойунда 11-августта чыккан өрт өчүрүлүп, учурда абал туруктуу. Өрттүн кесепетинен жабыркаган адамдар болгон жок. Бирок өрттөн болжолдуу 0,2-0,3 гектар аянт күйгөн. Бул тууралуу бүгүн Ак-Талаа райондук өзгөчө кырдаалдар бөлүмүнөн билдиришти.
Өрттү өчүрүүгө өзгөчө кырдаалдар бөлүмүнөн, токой чарбасынан, Тоголок Молдо айыл өкмөтүнөн жана Ак-Кыя айылынын тургундарынан жалпы 37 адам, 7 техника тартылган. Ошондой эле кошумча мотопомпо, чака, канистр менен суу ташып чыгышкан. Ал эми карагайлардын чок болуп күйүп жаткан тамырлары балта жана күрөктүн жардамы менен казылып алынып, суу чачылып өчүрүлдү.
