Террор менен экстремизм дүйнө жүзүндө күч алгандан бери бул түшүнүктү айрымдар ислам дини менен гана байланыштырат. Бирок ислам дининин табияты терроризм менен экстремизмге карама-каршы келет.  

Мына ушул түшүнүктөрдү көпчүлүккө жеткирүүнү «Ыйман» фонду колго алып, Ош шаарында имамдарды окутуунун кезектеги семинары башталды. Дин кызматкерлеринин сабатсыздыгын жоюуга багытталган бул иш-чара алты күнгө созулат. Маалымат бере кетсек, аталган фонд республикадагы дин кызматкерлерин 2015-жылдан бери окутуп келет. 

Ал арада, эркектер менен бирге эле аялдарга да диний сабаттуулук зарыл деген муфтият жер-жерлерде атайын борборлорду ачып, аялдардын сабатсыздыгын жоюу менен күрөшүп келет. 

Теолог Абдилазиз Калбердиевдин пикиринде ислам деген сөз-тынчтык дегенди туюндурат. Тилекке каршы, коомубузда ислам динине көлөкө түшүрүп жаткандар да жок эмес. Мындай аракеттер барып эле, туура эмес диний түшүнүктөгү жарандар тарабынан жасалып жатканы айдан ачык болуп калды.

Мына ушул сабатсыздыкты жоюу максатында президенттин алдындагы «Ыйман» фонду 2015-жылдан тартып, дин кызматкерлерин окутуп келет. Азыркы учурга чейин, республика боюнча 2300 имам окууга катышты.

Былтыркы жылдагы окуунун биринчи этабында - 600дөй имам атайын сабактан өткөндүгү туурасында атайын сертификатка ээ болсо, иш-чаранын экинчи этабында 140 имам окуудан өткөн. Ош облусунда 822 мечит бар болсо, андагы 822 имамдын баарына атайын сертификат алуу милдеттендирилген.

Эгемендүүлүккө жеткен 25 жыл аралыгында Кыргызстан 2014-жылы диний көз карашып, диний саясатын так аныктап алганга жетишти. Кабыл алынган концепсияга ылайык, кылымдардан бери калыптанып калган салттуу исламды кубаттап, колдоо максатында бир топ иш-мерчемдер кабыл алынган. Алсак, өткөн жылы пилоттук негизде республикадагы 10 мектепке дин таануу сабагы киргизилди. Түшүндүрүү иштери менен бирге имамдарды окутуу негизги багыттардын бири катары белгиленген.

Экстремизимди алдын алууда эркектер менен катар аялдардын да сабатсыздыгын жоюу башкы маселе экендиги бышык. Анткени, соңку жылдары согуш жүрүп жаткан өлкөлөргө кетип жаткандардын 25 пайызын мына ушул аялдар түзүп жаткандыгын расмий булактар ырастап келет. Андыктан, аялдарга туура жолду көрсөтүү - бул бүтүндөй коомду туура жолго салуу менен барабар, -дешет, адистер. Ушуга байланыштуу жер-жерлерде муфтияттын алдында аялдар үчүн атайын окуу борборлору ачыла баштады.

Укук коргоо кызматкерлеринин берген маалыматына караганда, коомдогу агартуу иштеринин натыйжасында, согуш жүрүп жаткан өлкөгө азгырылгандардын саны кыскарууда. Эң көп көрсөткүч 2013-104-жылдарга туш келген. Ал эми 2010-жылдан бери, жалпы Ош облусу боюнча 400дөн ашуун жарандын согуш жүрүп жаткан өлкөдө жүргөндүгү аныкталган.