Кара-Суулук Яхьё Машрапов түрк басма сөз өкүлдөрүнөн расмий түрдө кечирим сурашын талап кылууда. 

Машраповдун айтымында, түрк полициясынын кызматкерлери шектүүгө окшоштуруп алышканы үчүн кыргызстандык жарандан кечирим сурагандыгына карабастан, түрк басылмалары Машраповдун паспортунун сүрөтүн интернетке чыгарып жиберишкен.

Кара-Суу шаарынын 28 жаштагы тургуну , эки баланын атасы Яхьё Машрапов 2011-жылдан тартып, Кара-Суу базарында түрк фабрикаларынан чыгарылган эркектердин саркеч кийимдерин сатат. Ал, ортомчуларга төлөнүүчү төлөмдөн баш тартып, 2015-жылдан бери, Түркияга өзү каттай баштаганын айтат. POST1RIGHT 

 Адаттагыдай эле, жаңы жылга жаңы товар алып келгени Стамбулга 1-январга самолетко билет алат. 31-декабрь күнү Машрапов жоро-жолдоштору менен салтка айланып калган майрамдык плов даярдалган жайда чогуу болушат.

 Машраповдордун үй-бүлөсүн жакындан тааныгандардын айтымында, үй-бүлө мүчөлөрүнүн бири да буга чейин кандайдыр бир терс диний агымдарга кириптер болгон эмес.

Өз сөзүнө караганда, Машрапов 1-январда кечки 16.20дагы Бишкек-Стамбул авиа рейси менен Стамбулга учкан. 3-январь күнү Бишкекке кайтаарында аны түрк полицейлери текшерүүгө алган. Бир саатка созулган текшерүүдөн кийин анын терактыга эч кандай тиешеси жоктугу далилденип, учуп кетүүгө уруксат беришкен.

Кара-Суу шаарынын тургуну анын дарегине айтылып жаткан айыптын баарын «курулай доомат»,- деп атап, түрк басылмаларына нааразычылыгын билдирип, алардын расмий кечирим суроосун талап кылат.

Машрапов өздүк документин былтыр жайында Кара-Суу базарында жоготуп алып, мындан эки ай мурун гана жаңы паспорт алган. Азыр паспорт Машраповдун өз ыктыяры менен Улуттук мамлекеттик коопсуздук комитетинин Кара-Суу райондук бөлүмүндө сакталып турат.