Жогорку Кеңештеги "Ата-Мекен" фракциясынын депутаты Аида Саляновага козголгон кылмыш иши тыкыр иликтенип, укуктук баа берилиши керек. Мындай пикирлерин серепчилер билдиришүүдө. 

 Эске салсак, Салянова Юстиция министринин милдетин аткарып турганда кызмат абалынан ашкере пайдаланып, кылмышка шектелген Алексей Елисеевдин адвокаттык лицензиясын мыйзамсыз узарткан деп шектелүүдө. Кылмыш иши козголору менен Ата Мекендин лидери Өмүрбек Текебаев маалымат жыйын өткөрүп, Альфа телекомго тиешеси жоктугун айтып актанып чыкты. 

POST1RIGHT  2009-жылы “Альфа Телеком” жабык акционердик коому түзүлүп, анын жалгыз кожоюну Алексей Елисеев болгон. 2010-жылдын май айында Убактылуу өкмөт компаниянын 49 пайыз акциясын улутташтырган. Калган 51 пайыз үлүшү Southfield Management жана Vesatel United компанияларынын жеке менчигинде болгон. Ага дагы толугу менен Алексей Елисеев ээлик кылып турган. 
 Алексей Елисеев өзү Максим Бакиевдин жакын өнөгү, анын башкы юристи болгон. Ал 2010-жылга чейин мамлекеттик жогорку кызматтарда турган. Инвестиция жана инновациялар боюнча мамлекеттик борбордук агенттиктин жетекчи орун басары жана “АзияУниверсал банктын” директорлор кеңешинин төрагасы кызматтарын аркалаган. Башкача айтканда Максим Бакиевдин бардык экономикалык маселелерин Алексей Елисеев тейлеген.
Бир суроо ачык калууда: ошол кезде Максим Бакиев менен Текебаевдин байланышына ким ортомчу болгон, ким негизги ролду ойногон. Ортомчу Аида Салянова болушу мүмкүн. Анткени Кыргыз Республикасынын юстиция министрлигинин 2010-жылдын, 28-июнундагы №58-буйругу менен 2000-жылы 30-августта № 00813 номуру менен алынган Елисеев Алексей Александровичтин адвокаттык ишмердиги жандандырылган. Муну менен ал мамлекеттик кызматка өткөндүгүнө байланыштуу токтоткон жактоочулук иши менен кайрадан алектене баштаган.

Саляновага иш козголору менен Ата Мекендин лидери Омурбек Текебаев маалымат жыйынын чогултуп, УКМКнын Белизден алынган документтерин төгүндөөгө өттү. Өз сөзүндө ал партиялашына козголгон кылмыш иши тууралуу эмес, көбүрөөк Мегаком боюнча билдирүүлөрдү жасады.
 Ал эми Текебаевдин мурдагы партиялашы Омурбек Абдрахманов буга чейин Алфа телекомду сатуу келишими талкуланып жатканда, Омурбек Текебаев орусиялык Мегафон компаниясынан бир миллион доллар пара алганын айткан.
Серепчилер Аида Саляновага козголгон кылмыш ишинин арты менен Мегаком боюнча көмүскөдөгү бардык кыңыр иштер ачыкка чыгарын айтып жатышат. Өмүрбек Текебаевдин да бүгүн бул маселе боюнча тезинен маалымат жыйын өткөргөнү бекеринен эмес дешет.