Бишкек мэриясы “Балаты жашасын”-аттуу жаңы жылдык акцияны демилге кылды. Иш-чаранын максаты ийне жалбырактуу өсүмдүктөрдү сактап калуу. Шаар тургундары жаңы жылды тосуу үчүн сатып алган карагайларды сейил бакка же Жашылдандыруу ишканасы сунуш кылган бош жерлерге отургузса болот. 

“Зеленострой” ишканасынын кызматкерлери жаңы жылдык майрамдын көркүн ачкан балатыларды биринчи жолу даярдап жаткан жери жок. Аязбек Кийизбаев тянь-шань карагайын багып өстүрүүнүн жол-жобосун ийне-жибине чейин үйрөнгөн.
"Зеленострой” ишканасынын кызматкери: “Мен идиши менен балаты сатып алгандарга кеңеш берет элем. Аны жаңы жылдан кийин март айына чейин жерге отургузса болот”.POST1RIGHT
Шаарды жашылдандыруу жүгүн мойнуна алган “Зеленострой” кызматы балаты сатуу үчүн жарманке уюштурат. Жаңы жыл майрамынан кийин тирүү дарактарды сейил бак ичине же адис кеңеш кылган жерге тиксе болот.
Сергей Кравер, “Зеленострой” ишканасынын башкы агроному: 

“Карагайларды массалык түрдө кыйюдан сактап калуу максатында ушундай акция жүрүп жатат. Жаңы жылдан кийин миңдеген балатылар таштандыга ыргытылат. Андай көрүнүшкө жол бербөө керек.”
Жаңы жылдык акциянын уюштуруучуларынын пикиринде ар бир шаар тургунунун жашылдандырууга салым кошууга мүмкүнчүлүгү бар.
Ал эми борбордук Ала-Тоо аянтында жаңы жылга камылга көрүлүп жатат. Баш калаада баардыгы болуп 20 жасалма балаты орнотулат. Бир гана Жеңиш аянтында нагыз Тянь-Шань карагайы коюлмакчы.
Уланбек Дыйканбаев, Коомдук биринчи канал