Бир тонна таттууларды Кыргызстандан Тажикстанга алып өтүүгө аракет кылган жаран колго түшкөнүн Чек ара кызматы билдирди. 

Маалыматка ылайык Лейлек районуна караштуу Маргун-Арка унаа жолунда чек арачылар “Мерседес-Бенц Спринтер” үлгүсүндөгү унааны токтоткон. Бирок айдоочу баш ийбей жолун улаган. 

“Чек арачылар эскертүү иретинде асманга ок чыгарып, андан соң унаанын дөңгөлөгүн көздөй ок чыгарган”, - деп айтылат маалыматта. Тиешелүү иш-кагаздары толтурулган соң, айдоочу жана жүк мындан ары териштирүү иштерин жүргүзүү үчүн тиешелүү органдын кызматкерлерине өткөрүлүп берилди.