Соңку жылдары Кыргыз жаңгагы өзүнүн уникалдуулугу жана экологиялык табигый тазалыгы менен чет өлкөгө таанылып келүүдө. Ал эми адистер быйылкы жаңгактын түшүмдүүлүгүн орто деп баалашууда. Учурда Жалал-Абад облусунда жаңгак терими 80-90 пайызга аяктап калды.

Терим башталгандан бери Кара-Алма токоюнда жаңгак терип жүргөндөрдүн бири Гүльмира Нукеева. Өзүнүн ижарага алган 5 гектар жаңгак аянтын бир сыйра терип бүткөн. Азыр эми калган-каткан жалбырак менен кошо түшкөн жаңгактарды терүүдө. Ушул учурга чейин үй-бүлөсү менен 2 тонна жаңгак теришкен. Гүльмира Нукееванын айтымында,жаңгак терим кар түшкөнгө чейин улана берет.

Ал эми Кара-Алма токой чарбасында 4миң 800 гектар жаңгак аянты бар. Бул токой аянт жалпы 662 жаранга,тактап айтканда,ар бир ижарачыга 5 гектарга чейин бөлүнүп берилген. Ижарчылар болсо гектарына жыл сайын 1200 сомго чейин төлөп турушат.

Кара-Алма айыл өкмөтүндө 4 миңге чукул жашоочу болсо,алардын бардыгынын жашоо тиричилиги токойчулук менен тыгыз байланышат. Жайытсыз жана дыйкачылык аянттары жок токойчулук менен жашоо тиричилик өткөргөн айылдар Жалал-Абад облусунда арбын.Жалпысынан облус боюнча 936 миңден ашуун токой аянты болсо,анын 35 миң гектарын жаңгак аянты ээлейт. 

Ижарачылардын саны 7 миңге жетет. Жыш жаңгак аянттар, Сузак, Базар-Коргон жана Аксы райондорунда жайгашкан. Ал эми адистер быйылкы түшүмдүүлүктү 60 пайыз деп баалашууда. Анткени май айындагы жамыр аралаш жааган кардын кесепети түшүмдүүлүккө залакасын тийгизген.