Корпорациянын тарыхы 1931-жылдан башталат. Кыргыз радиосунун расмий ачылган күнү — 1931-жылдын 20-январы.

Дал ошол күнү Фрунзе шаарында узундугу 25 чакырым болгон радиоузел толугу менен пайдаланууга берилген. Ал 300 радионукту камтыган абоненттик тармакка ээ болгон. 1930-жылы Фрунзе шаарында типтүү радиоузелдин курулушу башталып, 1931-жылы ал толук ишке киргизилген.

Совет мезгилинде Кыргыз радиосу, албетте, кыргыз элинин жашоосунда маанилүү роль ойногон. Ал башка маалымат каражаттары сыяктуу эле пропаганданын куралы болуп, идеологиялык максаттарга кызмат кылган. Бирок ошентсе да бул радио элге керектүү маалыматтарды жеткирген, угармандарга өлкөнүн таң калычтуу маданий ар түрдүүлүгүн тааныткан.